mércores, 25 de abril de 2018

VISITA A GADISA EN BETANZOS



O pasado martes día 17 de abril, os cursos de Almacén, Industrias Alimentarias e Comercio fixeron unha visita guiada ao centro loxístico que Gadisa ten no Pol de Piadela, en Betanzos.





Alí puideron ver como se xestiona o almacenamento de máis de 11.000 artigos que non necesitan refrixeración, e a súa distribución a todos os puntos de venta.


Quedamos gratamente sorprendidos e sorprendidas ao ver que a nosa guía fora alumna dun dos nosos centros, o IES Canido.

Graciñas Paula, e a todo o equipo de traballadores e traballadoras de Gadisa!!

luns, 26 de febreiro de 2018

FALLADO O CONCURSO LIDERA-FERROL 2017



A alumna dos PFB, Jennifer Martínez Rodríguez, foi galardonada co 1º premio do Concurso Lidera 2017, do concello de Ferrol, no apartado de fotografía e na categoría de maiores de 21 anos, coa obra A frescura da cerdeira. Parabéns, Jenny!

Enlaces á noticia nos medios de comunicación:

  • http://www.ferrol.gal/Concello/NovasAmpliar/4038
  • http://www.diariodeferrol.com/articulo/ferrol/concello-ferrol-reconece-talento-artistico-da-mocidade/20180221234910217285.html



martes, 20 de febreiro de 2018

INICIO DO PERÍODO DE PRÁCTICAS EN EMPRESA

Un dos obxectivos deste programa é o de garantir unha formación básica e profesionalizante que faga posible a incorporación dos rapaces e rapazas ao mundo laboral. A Formación en Centros de Traballo (FCT) ou Prácticas en empresa é ese complemento indispensable da formación.

Un curso máis xa comezamos esta nova etapa, a das Prácticas. É o momento de demostrar os coñecementos adquiridos nas empresas de formación, e amplialos nun entorno real de produción.

Esta fase é moi importante xa que o alumnado, dende o mes de xaneiro ata o de xuño, e durante tres días á semana, estará nunha empresa cun titor ou titora que lle servirá como referente na súa aprendizaxe, acompañando e titorizando o seu labor.

Ao final desta etapa, o empresario ou empresaria emitirá un informe-valoración de cada un dos alumnos e alumnas. É neste momento (ou antes incluso!) no que o empresariado xa poderá dispor dun persoal ben formado e disposto a traballar.

Rapazada, poñede toda a carne no asador con ilusión e interese, que ao final teredes a recompensa ao voso esforzo. Moito ánimo!!!!!

venres, 2 de febreiro de 2018

OBRADOIRO DE OBSERVACIÓN ASTRONÓMICA


Dentro do programa de Actividades Complementarias e Extraescolares, o pasado día 30 de xaneiro fixemos un Obradoiro de Observación astronómica organizado pola Sociedade Galega de Historia Natural, na Aula Reciclaterra, en Mougá (Ferrol).


Paulino e máis Xosé deleitáronnos cos seus coñecementos, e unha noite de lúa chea e sen nubes foi o colofón a un avistamento de numerosas estrelas, constelacións, galaxias e algún que outro satélite.

Abofé que moitos de nós xa non miraremos ao ceo do mesmo xeito. Que pequeniños somos!!!

Moitas grazas á SGHN e a Paulino e Xosé por brindarnos esta fermosa oportunidade.

CURSO DE PRL E MANIPULADOR/A DE ALIMENTOS

PREVENCIÓN DE RISCOS LABORAIS (PRL)

O pasado día 8 de xaneiro comezou un curso de Prevención de Riscos Laborais de 60 horas, dirixido ao alumnado dos perfís de Almacén e Limpeza.

En calquera posto de traballo, é necesario avaliar os posibles riscos aos que os traballadores e traballadoras podan estar expostos, para poder planificar e executar a actividade preventiva.

Con este obxectivo, fundamentalmente preventivo, o alumnado realizará este curso co fin de chegar a ser máis conscientes do seu entorno de traballo, da necesidade dunha boa organización e limpeza do mesmo, así como o correcto manexo de aparellos e produtos, para evitar accidentes innecesarios.

MANIPULADOR/A DE ALIMENTOS

A obtención deste certificado tamén pasa por unhas sesións de formación coas que se pretende dar información sobre a correcta forma de manipular calquer tipo de alimento, e asegurar a hixiene do produto final que se lle ofrece ao cliente.

Este curso xa foi realizado polo alumnado de Cociña e Restauración, Industrias Alimentarias, Comercio e Almacén polo que, xa poden pasar á fase de Prácticas co certificado correspondente.

luns, 11 de decembro de 2017

OBRADOIRO DE IMAXE PERSOAL

Na atención ao público, nunha entrevista de traballo,... é importante dar unha boa imaxe; é a nosa carta de presentación. Coidar o noso aspecto é un factor relevante, sobre todo cando estamos de cara ao público.

Por este motivo, o pasado luns día 4 de decembro asistimos a un obradoiro de Imaxe Persoal no IES Carvalho Calero.

As profesoras e as alumnas do 2º curso do ciclo de grao medio de Estética e Beleza fixeron unha presentación cunhas normas básicas de aseo e coidado persoal, atendendo ás dúbidas que o alumnado lles plantexou.

Como colofón, realizaron un cambio de imaxe de tres alumnas dese curso (na fotografía), onde puxeron en práctica os consellos que nos deron, e que demostra a relevancia que ten un bo aspecto.

O aspecto exterior pregoa a condición interior da persoa (Shakespeare)

luns, 13 de novembro de 2017

ROTEIRO "FERROL REBELDE"

"Ferrol Rebelde" é unha actividade organizada pola concellalía de Participación Cidadá do Concello de Ferrol. Un roteiro por aqueles sitios emblemáticos da historia obreira da cidade e de Galiza dos últimos 100 anos. Os pasados días 23 e 24 de outubro, o alumnado do IES Canido e IES Ferrol Vello realizaron esta actividade, xunto con Olga, a nosa historiadora particular, que ilustrou coma ninguén cada unha das paradas coas súas amenas e rigorosas exposicións.


A nosa cidade é berce dunha longa estirpe de rebeldes que fixeron de Ferrol un referente da dignidade proletaria. O obxectivo é divulgar a historia do pobo traballador, das mulleres e dos homes que loitaron pola conquista dos dereitos democráticos: Amalia Fraguela, Pablo Iglesias (na foto o monumento), Francisco Fernández García-"Pedrosa", o Centro Obreiro de Cultura, Moncho Reboiras, Amador Rey e Daniel Niebla,...


  • NON ESQUEZAMOS ás persoas que loitaron polo que agora vemos con normalidade e sigamos traballando por mellorar: os dereitos dos traballadores e traballadoras, a democracia, a nosa cultura...
  • LOITEMOS por manter todo aquelo polo que tantas persoas perderon a vida, e facerlles xusta homenaxe transmitindo aos nosos fillos e fillas todos estes valores.